Haina

Ko te Pakitara Nui o Haina tonu tētahi o ngā tino whakamīharotanga whakaharahara o te ao. Koinei anake te mea kua hangaia e te ringa tangata; ka kitea mai i te marama rawa.

He tino tawhito tenei pakitara. He mea tīmata tōna hanganga i ngā tau e rua mano, e whitu rau tau ki muri. Ko te take i hangaia ai ia, kia kore ai te hoariri e whiti atu ki te patupatu i te iwi. Me kī, he pātū tēnei hei tiaki i te iwi kāinga.

E ono mano, toru rau, rima tekau kiromita te roa o Te Pakitara Nui o Haina. Rite tonu te roa o tēnei pātū ki te tawhiti o Te Reinga ki Te Whanganui-a-Tara; hoki atu ki Te Reinga, hoki mai anō ki Te Whanganui-a-Tara.

Ko tōna teitei, 7.8 mita. Ko te whānui o raro, 6.5 mita. A runga, 5.8 mita. He nui ngā pourewa me ngā pūaha. Ka piki ana koe ki runga i te pakitara nui nei, ka mīharo koe ki ngā tāngata nā rātou nei te mea nei i hanga.

Koia tēnā e tū nā i ngā maunga me ngā puke, ka heke ki raro i ngā awaawa, ka tū i roto i ngā kōraha. I hangaia mai i te pōhatu me te oneone, engari he rerekē anō ngā momo rauemi i whakamahia e rātou mō tēnā, mō tēnā wāhanga. Ko te take i pēnei ai, he uaua hoki te kawe atu i ngā rauemi katoa ki ngā wāhi e tau atu ai rātou. Nā tērā, ka whakamahia ko ngā rauemi tonu o tēnā, o tēnā takiwā, kia māmā ake ai te mahi. Mō ngā wāhanga e tū nei i ngā maunga, ka whakamahia ko ngā pōhatu tonu o aua maunga. Hei ngā wāhanga kōraha, ka whakamahia ko te oneone.

He mahi tino uaua te hanga i te pakitara nui nei; te tapahi i ngā paraka pōhatu, te hari pōhatu ki runga i ngā maunga, aha atu. He nui ngā tāngata i mate i tēnei mahi nui whakaharahara.

Mehemea ka haere koe ki Haina, me toro atu koe ki Te Pakitara Nui o Haina. Kōtahi haora i waho atu o Beijing, ka kite koe i tētahi wāhanga ōna i runga maunga, ā, ka heke iho ki raro ki ngā awaawa. He tini ngā manuhiri o tāwāhi ka taetae atu, ki te tirotiro i tēnei mea mīharo i waihangatia nei e te tangata.