Tahoua, Niger

Koinei tētahi o ngā whenua tino maroke rawa atu o te ao. E pātata ana tēnei takiwā ki te koraha nui e kīia nei ko ”Te Koraha o Sahara”. Nā te kore marangai tonu, ka uaua te tipu o te rākau. Ā, nā te kore rākau me te kore pōhatu anō hoki, ka tahuri te tangata whenua ki ngā mea tonu o tōna whenua. Ko te oneone, ko te whare uku rānei tērā.

He wāhi tino wera tēnei i te awatea engari he wāhi makariri i te pō. Nā reira, me mātotoru tonu ngā pātū o ngā whare uku. Hei reira, kua āhua mātao te whare i te awatea, ā, tau mai ana te pō, ka mau tonu te mahana.

Kei ia whānau, kei ia kāinga anō hoki ōna anō tikanga. Engari mai i tērā whakatupuranga o mua tae noa ki tēnei o nāia tonu nei - kei te mau tonu te iwi nei ki ā rātou nā whakahaere. Nā, kahore e riro ana mā te tangata kōtahi anake aua whare nei e tiaki, e tapi. Ahakoa he aha te mahi, ka aronui katoa atu te whānau whānui ki te mahi tahi.

Ko tētahi o ngā tino whare uku maroke o tēnei wāhi, ko te Yaama Mosque. Nā Falke Barmou i whakahaere ngā mahi mō tēnei whare i te tau 1962. Ka hangaia taua whare nei ki te rākau me te pereki uku maroke. Nā te iwi whānui o tēnei wāhi o Niger te mosque nei i whakatū hei whare karakia mō ngā Muslims.

Ko te whenua e tū nei aua whare, he mea tuku nā ētahi o te iwi. Ā, nā ētahi ko nga pereki, nā ēra te wai i kawe atu, ā, nā ēra atu ngā rākau i tari mai. Tae noa mai ki ēnei rā, kei te kaha tiaki tonu ngā iwi o tērā whenua i ngā whare o te mosque. Te whakahou haere, te tapi haere i te whare.

# Ref. 4  A roto o te Yaama Mosque

# Ref. 4  Te Yaama Mosque.