Sadinia

Te moutere o Sardinia, Itāria

He maha ngā whare uku maroke kei te tonga o Sardinia. I te mea he iwi rawakore ēnei, e nui ana te uku, ka mau tonu rātou ki ēnei tū whare.

Ko ngā pereki uku maroke ka hangaia i te uku, i te tākakau me te wai. Ko ngā pakitara o te whare, ka hangaia ki ngā pereki uku maroke. Ko ngā pereki taera, ka meatia ki te tuanui o te whare.
Ahakoa ngāwari noa iho te hanga i ēnei tū whare, he mahi nui tonu. I ngā rā kua taha, ka mahi tahi ngā tāne me ngā wāhine ki te hanga i ēnei tū whare.

I te mutunga o te Pakanga Tuarua o te Ao, ka turakina e taua iwi nei ō rātou whare. Nā runga tonu rā i te pōhēhē, e tohu ana aua whare nei i tō rātou rawakore, tō rātou pōhara. Kāti, ka hangaia nā he whare hou. Ka mahue te uku, te tākakau, ka tīkina atu he mea kē noa atu.

Engari nō ngā tau tata nei, kua hoki a mahara ki ngā painga o aua whare tawhito rā. Kua mahara ake te iwi, āe, pai kē atu aua whare rā, nā te mea ka noho mahana tonu hoki te whare i ngā pereki uku i te takurua, ka noho mātao i te raumati.

I ēnei rā nei, kua mōhio ngā kaunihera he tino taonga tonu te whare uku maroke, ā, i nāianei kei te tino manaakihia. Waihoki, mā te tiaki tonu i aua whare, e mau tonu ai ngā mātauranga me ngā pūkenga hanga whare o ō rātou tūpuna o Sardinia.