Syria
Neke noa atu i te 8000 tau ki muri te hanganga i ngā whare miere tuatahi. Heoi, kei te hangaia tonutia ēnei whare e ngā Arapī e noho nei i te raki o Syria. Tika ana, i te mea kāhore tonu hoki he rākau o tērā takiwā. Horekau he rino, horekau he raima, he karaehe, he konumohe.
Hei ngā whare miere nei, ahakoa te tino wera i te raumati, ahakoa te makariri, te kaha pupuhi rānei o te hau i te hōtoke, maru ana te noho a te iwi. Heoi, ahakoa ngā whakamātau a te rū i te raki o Syria, auare ake! Ka tū marō tonu aua whare.
He pēnei te hanga i te whare miere. Tuatahi, ka hangaia he puke i te pōhatu me te oneone. Tuarua, ka kokoaakatotatia mai te oneone o roto ki waho. Hei te mutunga, ka taea e te tangata te tū i roto, ā, ka hangaia nā he pūaha i te tuanui kia uru mai ai te mahana i ngā hihī o te rā.
Hei ēnei tū whare, torutoru noa iho ngā matapihi iti hei ārai atu i ngā kōnakonako o te rā me te hau wera o waho. Engari kia tae ki ngā pō, kua riro mā aua matapihi iti noa nei te hau makariri e ārai atu.
Ko te take i teitei ai te tuanui ko tēnei. He whakamarumaru, he whakakōtao tāna i te wera o te rā. Ka tū poupou te tuanui, kia tere ai te rere iho o te ua i te tuanui, arā, kia kore ai te wai ua e noho tonu i ngā pereki. Ki te noho tonu hoki te wai, tera ka pākarukaru.
Nā reira, he pai ēnei momo whare mō ngā wāhi pēnei, i te mea āhua mātao anō hoki i te raumati, āhua mahana tonu ana i te takurua. Ahakoa te hukapapa i te takurua, ka noho mahana tonu te iwi e noho nei i ō rātou whare miere.
# Ref. 3 He rārangi whare miere tēnei kei Sarouj; kei roto o Hama, Syria.
Kupu Taka