Waimate

Ko te moemoeā o Robert rāua ko Marijke White kia tū i a rāua he whare uku maroke i tō rāua pāmu i Waimate i Te Waipounamu. Ko te tino hiahia, kia mahana tonu tō rāua whare, ā, me tō rāua mōhio hoki he pai te pereki uku maroke ki te ārai atu i te makariri.

Ko te mate kē, neke atu i te 2000 pereki ‘uku’ i hangaia-ā-ringatia mō taua whare nei. Waimarie kē rā rāua i ō rāua hoa o Waimate me ā rāua tamāhine tokotoru.

I te tuatahi, ka whakamātauhia nā e te whānau ētahi momo pereki. Rerekē te wāhanga o te uku, te tākakau me te wai o roto i ngā pereki.

Me tino pakari tonu hoki ngā pereki, kia kore ai te whare hou nei e pakaru, e ngahoro noa. Me tā rāua whai tonu i ngā ture hanga whare. I te mutunga atu, ka kitea e rāua me pēhea e pakari rawa atu ai ngā pereki.

E pēnei ana ngā whakataunga: Ko te uku, kia rua ngā wāhanga, ko te puehu pohatu, kia kōtahi te wāhanga, ko te tākakau kia hāwhe te nuinga o te paraka. Mā te tarakihana me te moua te tākakau e topetope, e poke ki te uku. Ka purua ki runga wākena tō, ka takatakahia pēnei i te takahi kerepi nei. Ka meatia nā kia toru ngā waihanga pereki: 300mm x 300mm x 150mm te nui.

Ka kite hoki te whānau me whakamaroke ngā pereki ki raro tuanui, kaua e waiho ki roto i te marama o te rā. Kia hipa te whā rā, ka hurihia ngā pereki ki ō rātou taha, ā, ka waiho mō te wiki kōtahi. Kātahi ka tāpaetia, kia tekau ki te tekau mā rima pereki te teitei. Maroke ana ngā pereki, kua tīngongo. Whā tekau kirokaramu te taumaha o te pereki mākū. Āhua rua tekau kirokaramu nei pea te taumaha o te pereki maroke. Ahakoa te nui o te mahi, tutuki pai ana tēnei moemoeā.

# Ref. 2