Whangaehu Marae

Ko Ruapehu te maunga
Ko Whangaehu te awa
Ko Rangitahuahua te wharenui
Ko Te Aroha te wharekai
Ko Tiehutia-te-waka te kohanga reo
Ko Kurahaupo te waka
Ko Apahapaitaketake te tangata
Ko Ngāti Apa te iwi
Tīhei mauri ora!

#Ref. 32 Koia tēnei te wharenui o Rangitahuahua kei te marae o Whangaehu. Ko ōna pakitara he mea hanga i te oneone whakatuki..

Ko tētahi o ngā wharenui mīharo o te ao Māori, ko te wharenui kei te marae o Whangaehu, kei te whenua o Rakautaua i te takiwā o Whanganui.

Mō tō rātou wharenui hou, i āta wānanga rawa te iwi i te taha o David Jones. Ka whakatauria kia hangaia he whare uku, i te mea ka noho mahana tonu hoki i te hotoke, ā, ka mātao i te te raumati. Koia ko te whare oneone whakatuki. Ahakoa kāore e kitea-ā-kanohitia atu te one whakatuki mai i waho o te whare engari me mīharo tēnei whare he mea hanga pēnei nei ōna patū. Koia nei tētahi o ngā rerekētanga o tēnei wharenui.

No te tau 1986 ka pau te tekau marama kia oti ai te whare. Nā ngā whānau o te marae tēnei whare i hanga. Nui ngā taumahatanga, ngā hekenga werawera, kia tū tēnei whare. Heoi anō, nā runga tonu i te whanaungatanga me ngā haumarutanga o Tāne Whakapiripiri, i oti ai te mahi, i tutuki ai ngā wawata. Ko ētahi o ngā kaihautū he kāmura, ko ētahi he kaimahi paipa, ko ētahi he kaimahi whakapuru raima. I tēnā, i tēnā anō ōna ake pūkenga hanga wharenui. Ahakoa tō rātou tauhou ki te whakatuki oneone mō ngā pātū o te wharenui, kāore noa i roa kua taunga.

Nō ngā tau tata nei, ka waipuketia te awa o Whangaehu. E tū kōtata ana te wharenui nei ki te awa. Ahakoa nga ngau kino a te wai, ka tū pakari tonu te wharenui. E tū ana tēnei wharenui uku hei whakaruruhau mō te iwi o Ngāti Apa e noho tata ana.