Hoahoa Whare

Hei tō hoahoa whare, he maha ngā mea hei āta whakaarotanga māu. Ehara i te mea ko tōna āhua noa iho kia ātaahua, e kāo. Ko te mea nui kē, kia aro koe ki ngā mea e pai ai te noho a tō whānau. Tēnā, he aha ngā tikanga, ngā whakahaere a tō whānau? He aha ētahi āhuatanga hei whakauru atu māu ki tō hoahoa whare? Āta tirotirohia ngā hoahoa whare o Aotearoa, o tāwāhi hoki. Tērā ka taea tonutia e koe ētahi o ngā āhuatanga o ngā whare tawhito te whakauru atu ki tōu nā whare.

Anei ētahi āhuatanga hei whakaarotanga māu:

Mena e hiahia ana koe ki te whakatū mahau, kia rite ki tō te wharenui, tērā ka whai hua kē atu tō whare. Māmā kē atu pea te rere atu ki waho mā te mahau, te kuhu mai rānei ki rō whare mā reira. Te pōwhiri, te manaaki anō hoki i tō manuhiri, aha atu. Hangahanga noa iho te tunu kai i te mahau o tō whare, ā, pai noa ana te kai, te kōrerorero, te whakangāhauhau, te whakatā, te nohonoho haere. Heoi, me aro atu te mahau ki hea? Mena e whakamahia ana te mahau mo te kai, mō te huihui, te tiaki manuhiri, me kaua tērā wāhi e makariri. Me uru mai, me noho tonu te mahana o te rā. Nā reira, hei ēnei mahi āhau, āta whakaarohia mena ka whakatūria e koe he mahau, kāore rānei.

Ko ēnei whare nō ēnei rā tonu nei, heoi anō ko te mahau o tētahi, he mea hanga kia rite ki tō te wharenui.

Hei tō hoahoa whare me te āhua o ngā rūma o tō whare, whakaarohia ō manuhiri. Nā, e ōrite ana te rūma noho o tō whare ki te poho o te wharenui? He wāhi tēnei hei huihuitangai hei kōrerorerotanga mō koutou, he wāhi anō hoki mō tō manuhiri. He wāhi mō tō whānau, ahakoa he aha te kaupapa. Nā konā, e tika ana kia nui tonu tēnei wāhanga, arā, kia āhei ai te tini te kuhu mai, kuhu atu. Tua atu, inā pā te ringa o Aituā, kua whakamaraehia tonutia atu e tātou ō tātou kāinga noho. Pērā ana, kua meatia te ruma noho hei wāhi takoto mō te tūpāpaku, hei wāhi moe mō te whānau. Nā reira, kia rahi tonu te rūma noho, kia hauhau tonu, arā, kia pai ai te uru mai o te hauora. Ka mutu, me wāteatea anō hoki te huarahi haere atu, hoki mai i te wharepaku me ngā wāhi horoi.