Whakaritea ngā whakamātau

Whakaritea he whakamātau hei āwhina i a koe ki te whakautu i āu anō pātai.

Mena he maha ngā pātai, ka maha anō ngā whakamātau. Heoi, hei whakatinana i tā rāua kaupapa, ka whakaritea nā e Rau rāua ko Keepa he rōpū rangahau. E whai iho nei, ko ētahi o ngā mahi whakamātau a taua rōpū rangahau.

Te āta mātai i te oneone. Ka tātarihia nā e ētahi o ngā kairangahau ngā tauira oneone. Ka tautuhia ngā korakora o roto, kia kitea ko tēhea ake te ranunga pai.

Te tūkuku mai i te muka. Ko te mahi a tētahi o ngā rōpū, he hanga i tētahi mīhini hei tūkuku i te muka mai i te harakeke. Me te whai tonu kia iti noa iho taua mīhini, arā, kia māmā noa ai te hikihiki, te tari haere.

E mōhio ana tātou, mā te whakauru rawa atu i te muka ki te ranunga mō ngā pereki, e pakari kē atu ai ngā pereki uku. Nā tērā, nui tonu te muka i tūkukua mai, kia tū pakari ai te whare. Me te roa hoki o tērā mahi, arā, te tūkuku mai i te muka mā te ringa. Koinā a Rau rāua ko Keepa i huri ai ki ētahi tonu o ngā tohunga pūtaiao, tohunga hāngarau, arā, kia riro mā aua tohunga rā e waihanga mai he hoahoa mīhini. Ki te oti mai hoki he mīhini, tērā ka māmā, ka tere ake te haere o ngā mahi. Waihoki, kia iti noa iho taua mīhini, kei nui rawa hoki te utu, ka tahi, kia kaua e taumaha rawa, ka rua.

Kei raro iho nei ētahi pikitia o taua mīhini tūkuku muku nei.

 

Te whakamātau i te kaha, te pakari o ngā pakitara. Mō ngā pakitara o te whare, ka tāpirihia te oneone me te muka. Kātahi ka whakamātauria te pakari, te kaha o ngā pakitara, inā rū te whenua.

I mua noa atu i tō hangatanga i tō whare uku, e tika ana kia mōhio koe ki te ranunga e pai ana mō te hanga pereki uku. Me tō whakamātau anō hoki i te kaha o ngā pereki, arā, kia kore ai e pākarukaru noa, ka hinga tō whare. Nā, koinā anō ngā mahi a Rau rāua ko Keepa. Nā te rahi o ā rāua pereki, ka riro mā te mīhini rawa e whakamātau te kaha, te pakari o aua pereki. Inā pakaru te pereki, kua tahuri rāua ki te whakamātau me pēhea te whakatika.

Kei raro iho nei ētahi pikitia e whakaatu ana i ngā mīhini e whakamātau ana i te kaha, te pakari o ngā pereki uku.

Te hanga whare uku. Ko te hiahia o Rau rāua ko Keepa, kia tū kia rua ngā whare uku. Tētahi ki rō tāone, tētahi ki waho tāone, arā, ki tētahi papa kāinga. Kāti, ka mahi tahi nā ngā whānau me te rōpū rangahau ki te whakatū whare uku.

Te whakatū hui. I hui tahi ngā kairangahau i te taha o ngā iwi mō rātou nei te whare uku. He wā tēnei ki te whakawhiti whakaaro, ki te kōrero mō ngā āhuatanga katoa o te mahi rangahau, aha atu. Ngā piki, heke, ngā hua me ngā tūmanako anō hoki mō ngā tau kei te heke.