Rangahau Kaupapa Māori

Ehara i te mea ko ngā ākonga anake kei ngā whare wānanga ngā mea kei te rangahau, e kāo. I te mahi, i te kāinga, i te kura, ko tātou katoa ēna e rangahau nei i ngā wā katoa, i ngā wāhi katoa. Nā reira, hei tēnei mahi āhau, kimihia, rangahaua! Kaua e waiho mō ō mahi o te kura noa iho.

Mā te āta whakarongo, te āta pānui me te āta ketuketu haere i ngā kōrero, tērā ka puea ake he whakautu ki tō rangahau. Mā te kōrerorero, mā te whiu pātai, mā ngā tuhituhi rānei a tētahi atu me āu anō hoki e puta ai ōu nā whakaaro me tōu nā mōhio. Arā, mā tō rangahau tonu ō pātai e whakautu.

Huri noa, ko te ’Rangahau Kaupapa Māori’ tonu te ingoa e whakamahia nuitia ana e te hunga kairangahau Māori. Ko ngā tino whāinga o te Rangahau Kaupapa Māori ko ēnei nei. Arā, kia mau tonu te kairangahau ki tōna Māoritanga ka tahi, kia tiakina e te kairangahau ngā tikanga a kui, a koro mā i a ia e rangahau ana, ka rua. Ka toru, me hoki tonu atu ngā hua o te rangahau ki te whānau, ki te hapū me te iwi.

Nā reira, kia kaha tonu koutou ki te kimi whakautu ki ā koutou pātai. Mā te kōrerorero tonu ki tō whānau, mā te ketu pukapuka i ngā whare pukapuka, mā te rapu kōrero i te ipurangi, mā te whakamātau i ngā āhuatanga hou, tauhou, rerekē rānei e puta ai he māramatanga. Rapuhia ngā kōrero, mahia te mahi!