Tātarihia ngā kitenga

4) Tātarihia ngā kitenga o ngā whakamātau

I roto i tēnei mahi, mātua te tātari haere i tō kaupapa me ngā kōrero, ngā mahi kua āta rangahaua e koe. Mā te tātari hoki e puta ai ngā kitenga:

• Te tūmomo oneone pai mō te whare uku.
• Te nui o te oneone, me te nui o te muka mō te ranunga. 
• Ngā painga o te mīhini tūkuku muka. He tere ki te tango mai i te muka, ā, he ngāwari anō hoki ki te kawe haere ki ngā wāhi hanga whare uku. 
• Te kaha me te pakari o ngā pakitara he mea hanga mai i te uku me te muka. 
• Nā te mōhio o te kaiwhakahaere ki te hanga whare uku, ka māmā ake ki te iwi te ako i ngā pūkenga hanga whare uku. Me tō rātou ū anō hoki ki te kaupapa, tae noa ki te mutunga. 
• Me noho pātata tonu ngā rauemi ki te whare. 
• Mena ka kaha ngā kairangahau ki te kōrerorero, ki te mahi tahi me te whānau, ka rere pai ngā mahi. 
• Kaingākau ana ngā whānau ki te whare uku nei i te mea nā rātou tonu hoki i hanga, ā, he hononga anō hoki tō taua whare ki a Papatūānuku.
  

Nā, kia tika ai tō tātari haere, tēnā hoki atu ki ngā pātai i puta rā i te tīmatanga o te mahi rangahau nei. Āta whakaarohia mena e taea ana e koe te whakautu. Mā te tātari, e mōhio ai koe mena kua tutuki i a koe tō kaupapa rangahau, kāhore rānei.

I ā rāua mahi, ka kite a Rau rāua ko Keepa he tino whare te whare uku mō te Māori, heoi anō, arā anō ētahi take hei tirohanga mā rāua. I tēnei wā, kei te hanga whare anō rāua i ētahi atu wāhi.