Rangahau

E aro atu ana tēnei wāhanga ki ngā mahi rangahau whare uku a Rau rāua ko Keepa. E hāngai ana ā rāua mahi rangahau ki te Rangahau Kaupapa Māori, ā, ko rāua ērā i mahi tahi nei me te hapori Māori kia tinana ai te kaupapa nei. Ka mutu, ko te tino whāinga o tēnei mahi rangahau a rāua, ko tēnei tonu. Arā, kia tū he whare pakari, he whare tōtika mō tāua te Māori.

Nā, ko tēnei mea te whare uku, kei ngā tōpito katoa o te ao huri noa, arā, he whare ērā nō mai anō. Inā tiro atu tātou ki tawahi, kei ngā kāinga pērā i a Syria, i a Ingārangi, i a Sardinia me Mehiko mā rā aua whare.

Ki a Rau rāua ko Keepa, ko ētahi o ngā painga o te whare uku, ko ēnei nei. Ko te iti tonu o tana utu i te tuatahi. Tuarua, i te mea ko ngā rauemi ka whakamahia nā nō te whenua tonu, ka mau pū tonu te hauora, te mauri ora o te taiao. Me te mōhio anō hoki o te tokorua nei, me tū pakari tonu te whare. Kia kaua e pā mai ngā mahi tukituki whare a tēnei mea te rū whenua. Nā, koinā rā tētahi o ngā tino kaupapa o tēnei mahi rangahau.

Kāti, ka whakatūria nā kia rua ngā whare uku. Ko tētahi ki Waimango, ko tētahi ki Piripono. Ko ngā rauemi i whakamahia nei ko te oneone tonu me te harakeke. He mahi nui, he mahi roa hoki tērā mahi, arā, te whakatū whare. Heoi, nā te arotahi tonu me te pakihiwi kaha anō hoki o te katoa, ka eke panuku!