Hine-ahu-one

Ko Tāne-Mahuta rā tērā o ngā tamariki a Ranginui rāua ko Papatūānuku, e kōrerotia nei i ngā kōrero pūrākau a tāua te Māori. Ko ia te atua o te ngahere me ōna āhuatanga katoa, ā, ko ia anō hoki te atua o te ira tangata. E ai ki ngā kōrero, nā Tāne-Māhuta a Ranginui rāua ko Papatuānuku i whakawehe. Nānā i piki ngā Rangi-Tūhāhā ki te tiki i ngā kete o te wānanga, arā, te kete Tuauri, te kete Tuatea me te kete Aronui. Ā, nā Tāne anō hoki i waihanga mai te wahine tuatahi.

E ai ki tēnei o ngā pūrākau, ka haere a Tāne-Mahuta ki tētahi kainga, ko Kurawaka te ingoa. I reira, ka waihangahia nā e ia te tangata, mai i te oneone. Ka hoatu e Tāne te hauora, ā, ka ara mai nā he wahine. Ka matihe, ka kī ‘Tihei!’. Ka huaina te wahine nei ko Hine-ahu-one. Ka moe a Tāne-Mahuta rāua ko Hine-ahu-one, ā, ka whānau mai nā tā rāua tamāhine a Hine-tītama .

Ka haere nā, ā, ka moe a Tāne-Māhuta rāua ko Hine-tītama. Ka whānau mai tā rāua tamāhine a Hine-rau-whārangi. Nāwai rā, ka pātai a Hine-tītama. ”Ko wai tōku matua?” I te mōhiotanga o Hine-tītama ko Tāne tonu tōnā matua, ka pā te whakamā. Nā, koinā te hekenga iho o Hine-tītama ki Rarohenga, ki te ao o te pō. Ko ia a Hine-nui-te-pō, ko ia te kaitiaki o te tatau o te pō, te atua o te mate.