Ngā wāhanga

He aha tēnei mea te oneone? Ehara i te paru noa iho, pēnā i te paru e mau nā i raro i ō maikuku, e kāo. Tū ana koe i te whenua, ko ō waewae kei te oneone e tū ana.

Ko te oneone e pērā ana ki te kiri rahirahi. Koia te papa o runga rawa; koia tēnā e kākahu nei i te mata o te whenua.

Ka takea mai te oneone i ngā toka kua horo me ngā waihotanga o ngā mea ora o te taiao. Ka horo, ka pākarukaru rānei te toka, ka mate rānei ngā mea ora o te taiao, ka takoto kau noa nā. Kātahi ka pirau haere. Ko te tukunga iho o tērā, ko te oneone tonu. Engari, he roa hoki te wā kātahi anō ka huri hei oneone. Manomano tau rawa te roa o tērā.

E rua ngā wāhanga o te oneone. Tuatahi, ko ngā korakora. Tuarua, ko ngā waihotanga o ngā mea ora.

Korakora

Ko ngā korakora oneone nō te kirikiri, nō te onepū, nō te parahua me te uku. Ko te tūtohi e whai iho nei, e whakaatu ana i te rahi o ngā korakora.

Ko te pikitia kei raro iho nei tēnā e whakaatu nei i ngā hua o te tātari oneone. Nā te maha o ngā wāhanga rerekē o te one, me tātari rawa i te tuatahi, kātahi ka rapu ai i te uku. He pai hoki te uku mō te hanga pereki. Tirohia te pikitia nei.

Kei te ipu ‘A’ ko ngā kirikiri. Kei te ipu ‘E’ ko te onepū. Kei te ipu ‘I’ ko te parahua. Kei te ipu ‘O’ ko te uku.

Ngā waihotanga o ngā mea ora

Ka ahu mai ngā waihotanga o ngā mea ora i ngā mea ora, pērā i ngā tipu, i ngā kararehe rānei. Mate atu ana aua mea nei, ka pirau haere. Nā, ko ngā waihotanga o aua mea ora rā, koia tēnā ka hou atu nā ki te oneone.

Nā, kāore e kore he ipu rāpihi kei tō kura mō ngā pepa, he ipu wairākau rānei kei reira mō ā koutou toenga kai, nē rā? Ko te toenga kai tonu tētahi o ngā tino waihotanga e pai ana mō te oneone.