Ngā tūmomo oneone

He maha ngā momo oneone. Huri noa, huri noa, he oneone rerekē tō tēnā, tō tēnā wāhi. Ko te take i pēnei ai, ko te rerekē tonu o ngā korakora kei roto i ia tū oneone.

Oneone Onepū

# Ref. 9 Te oneone onepū: ko tētahi o ngā koraha o Santa Fe tēnei.

He maha ngā wāhi e kitea ai tēnei tūmomo oneone, pērā i te koraha nui o Sahara rā. I te taha hauāuru anō hoki o Ahitereiria i ngā wāhi pērā i a Perth rā, tae atu ki ngā whenua o te taha hauāuru ki te tonga o Awherika.

Hei ētahi wāhi, he onepū katoa te oneone. I Aotearoa nei, ko ētahi oneone he onepū. Ā, tērā pea he oneone pēnei kei tō kāinga, kei tō marae, kei tō kura rānei.

Ko te nuinga o ngā whenua oneone onepū e noho hahore noa ana, kāore i te whakamahia. Nā te maroke rawa hoki o tēnei momo oneone, he uaua ka tipu te otaota, te rākau, te mārā, te whakamahi rānei i te whenua hei pāmū. Ahakoa tērā, hei ētahi wāhi ka whakamahia tonutia tēnei tūmomo oneone mō te whakataka kararehe pēnei i te kāmera, te koti. Engari me kaha tonu te tuku wai ki te oneone, arā, kia tipu ake ai hoki ngā otaota hei whāngai i ngā kararehe.

He maha ngā korakora nui kei roto i tēnei momo oneone.

Engari tē taea e tēnei oneone onepū te wai te pupuri, tae noa ki ngā whakamōmona o te whenua. Kāhore te oneone onepū e noho piri, ka ngohoro noa. Hei konā, kua kore e taea e ngā aka tipu te oneone te pupuri. Ka mutu, he taratara te oneone onepū ki te kiri tangata.

Parahua

# Ref. 10 He oneone: te awa o Powderly i roto o Amerika.

I Aotearoa nei, he maha tonu ngā wāhi e parahua ana te āhua o te oneone. Heoi, ko te te oneone parahua tērā ka kitea nei i ngā wāhi kua taupokina te whenua, arā, i ngā rua hangi tonu e whakautu me ngā wāhi hoki kua whakatikaina te rori.

Ki te puritia e koe te parahua, kōmāmā noa iho nei.Tarapī ake te parahua o te onepū, engari he māngūngungu. Waihoki, he pai te paru nei ki te pupuri i te wai. Ko tētahi o ngā tino wāhanga o tēnei paru, ko tana pai tonu mō ngā whenua mahi ahuwhenua, engari ko tana mate, ko tana kōmāmā. Nā tērā ka pūhia noatia e te hau, ka riro atu ranei tana kaha i te ua, i te waipuke. Pērā ana, kua horo te whenua.

Uku

# Ref. 11 He whenua uku whero tēnei kei North Carolina i Amerika..

Ko tā te uku tāna mahi, he whakataumaha i te oneone. He pai te uku mō te pupuri wai me te pupuri whakamōmona. Ko te raruraru, he pōturi rawa te tuku atu a tēnei momo oneone i te wai.

Ki te maroke te uku, ka māro haere. Pēnei tonu i te raima nei. Ki te pēnei, kua kore ngā oranga o te whenua e uru atu, e whai wāhi atu ki te uku. Anā, mate tonu atu ngā tipu.

He maha ngā tae rerekē o te uku; mai i te mā ki te whero. Ko ētahi o ana tae he kahurangi, he kōwhai, he kiwikiwi.

Nā, i a koe e rapu ana i te uku pai mō ō pereki uku, tīkina ko te uku āhua kiwikiwi nei te tae, i te mea he nui hoki te raima kei roto i tērā.

Onematua

# Ref. 12 He māra onematua tēnei kei Missouri i roto o Amerika.

He oneone pai tēnei. Ōrite tonu te nui o te oneone onepū, te parahua me te uku. He pai tēnei oneone ki te pupuri i te wai me te pupuri anō hoki i te paraumu. He oneone tino pai hoki mō te mahi māra.

He maha ōna whakamōmona, he nui te wai kei roto i te onematua, ā, he pai te manga o te onematua. Nā konā i pai noa iho ai te uru atu a te hau me te wai. He nui hoki te uku o roto, ā, nā reira i pai noa ai te piri a te paraumu ki te onematua. Nā konā i pai ai te tipu o te otaota.