Hei Tīmatanga

Hei tīmatanga mo tēnei mahi rangahau e pā ana ki te whareuku, ka titiro ki ngā mahi rangahau ā ētahi atu kairangahau Māori. Kātahi ka whakamārama atu i āu mahi hei rangahau i tēnei kaupapa.

1. Te mahi rangahau ā Rau rāua ko Kepa

I te tuatahi, mā tō kaiako e whakahaere i te kōrerorero kei waenganui i a koutou ko tō karaehe mo ngā whareuku me te mahi rangahau kaupapa Māori.

Ānei ētahi pātai hei timata i te kōrerorero:
- I kite koe i te whareuku?
- He aha te take e noho ai te tangata i te whareuku?
- He aha ētahi o ngā raruraru, ngā mate rānei e pā ana te noho i rō whareuku?
- He aha te mahi rangahau?
- Me pēhea te mahi rangahau hei āwhina i te iwi?
Ki te kore koutou e kōrerorero mo ēnei take, me hanga koe i te ohio manomano.
Mātakitaki i te kōpae whare uku mō te mahi rangahau a Rau rāua ko Kepa. Tūhia he whakarāpopototanga o ā rāua mahi. Ānei ētahi pātai hei āwhina i a koe.
- He aha rānei ngā take i tīmata a rāua mahi rangahau?
- He aha rānei ā rāua mahi rangahau?
- He aha rānei ngā kitenga o ā rāua mahi rangahau?
- Me pēhea tēnei mahi rangahau e āwhina i te iwi Māori?

2. Tāu mahi rangahau

I tēnei kowae ako ko koe te kairangahau. Ma tēnei paetukutuku (mā to kaiako hoki) e arahi i āu mahi hei rangahau mo ngā whareuku. He maha ngā tūmomo mahi rangahau ka mahia e koe. Āta pānui ngā tohutohu, ā, kia kaha hoki ki te rapu mohiotanga i ngā rauemi katoa. Ka āhei koe ki te mahi-ā-rōpu, ko koe anake rānei. Terā pea, i ētahi wā, ka mahi ki te taha o hoa, tō karaehe rānei, i ētahi wā he rerekē ngā mahi nō reira ka mahi i āu ake mahi.

Heoi anō, ko te tikanga ā te mutunga a te mahi rangahau e mohio ana koe he aha ngā ahuatanga e pā ana ki te hanga whareuku mō ngā whānau Māori, kua waia hoki e koe te mahi rangahau.
Mā tō kaiako e whakamārama ngā wāhanga me te āhua o ngā tūmomo mahi i tēnei kōwae ako. Kia kaha rā ki te whakamahi i te ipurangi me te kopae whaakaata i tēnei mahi rangahau.

3. Tuhia pātai matua

Ko tētahi o ngā tino mahi hei arahi i te mahi rangahau, ko te tuhi pātai matua. No reira, kōrero atu ki ōu hoa hei āwhina i a koe ki te tūhi i ngā patai (e ono pea) mo tēnei mahi rangahau.
- He aha ngā mea e hiahia ana koe kia mohio?
- He aha ngā mōhiotanga hei āwhina koe i te hanga whareuku?
Mā ēnei pātai hei āwhina i a koe ki te aro ki te kaupapa. Ka hoki ki ēnei pātai i te wā e rangahau ana kia mohio mehemea e tūtuki ana ngā whainga, kia arotake hoki āu mahi.

4. Whakaatu i āu mahi rangahau

Ko tētahi o ngā tino wāhanga o te mahi rangahau, ko te whakaatu i āu mahi rangahau. Ēhara te mahi rangahau māu anake, ēngari ka whai hua ngā kitenga o te rangahau mō te iwi whānui. Ahakoa kāore anō kia oti te mahi rangahau, me āta whakaarohia me pēhea te whakaatu i āu mahi rangahau ki tō karaehe me tō whānau. No reira, ā te mutunga o tō mahi rangahau kia kaha te whakarite i tētahi whakaaturanga rawe hoki!
- He paetukutuku
- He pānui nui
- He whakaaturanga rorohiko (pēnei i te powerpoint)
- He pūrongo
- He pukapuka
Kaua e wareware kia whakauru i ngā pikitia, ngā whakaahua rānei hei tautoko i tōu kōrero, tuhinga rānei. Kia kaha hoki ki te whakamahi i ngā whakatauki, ngā waiata me ngā kōrero a ngā tūpuna hei kīnaki i tō whakaaturanga. Āpitihia āu mahi katoa i oti i a koe hei tautoko i āu mahi rangahau.