Ngā Mira harakeke

Ngā mira harakeke

Tae atu ki te tau 1873, tata ki te 300 ngā mira i tū ki Aotearoa. Ko te nuinga o ēnei mira i noho tata ki ngā repo harakeke, ki te taha hoki o ngā awa. Ā, me tū pātata rā ka tika, he wai tonu hoki te hemonga o tēnei mea te mira! Nā, he mahi uaua te mahi i roto i ngā repo. He mākū, he makariri i te hōtoke me te wera hoki i te raumati.

Ko Miranui te mira harakeke nunui rawa atu o Aotearoa nei. I te rohe o te Manawatu taua mira. I runga i te 2300 heketea a ia e tū ana, arā, i te repo o Makerua, i te taha o te awa o Manawatu. He tini ngā pā harakeke i te repo o Makerua, ā, e ai ki ngā kōrero, 19 rawa ngā mira o taua rohe. Ka mutu, neke atu i te 700 ngā kaihauhake harakeke.

# Ref. 13  Ko te mira o Miranui tēnei i tū nei i te rohe o te Manawatu. Ko tenei whakaahua no muri tata mai i te puaretanga o taua mira i te tau 1907.

Te mahi tango muka a ngā mira harakeke

Ka tapahia e ngā kaimahi te harakeke ki te hūka koi, kātahi ka paiheretia. Ka mutu, ka purua atu ngā paihere harakeke ki runga i ngā waka o te mira, ā, ka taria atu ki ngā mīhini tango muka. Kia puta mai te muka i ngā mīhini, ka horoia i rō wai, kātahi ka kawea atu ki ngā pātiki, ka whakamarokehia, ka whakatokia. Tekau rā rawa ake, kua maroke. Kātahi ka whakahokia atu ki te mira, ka purua anōtia ki te mīhini. Hei tōna mutunga, mā tonu te muka. Ā, ka pēhia nā ki roto i te pēre, ka herea ki ngā taura, kātahi ka tonoa atu ki te tūranga tereina, ki te tauranga poti rānei.