Kōrero o Neherā: Ko Hinerehia

Whakarongo ki tēnei korero o neherā: Ko Hinerehia

E ai kī ngā iwi o Hauraki i ahu mai te raranga i tētahi wahine patupaiarehe, ko Hinerehia tona ingoa. I moe a Hinerehia ki a Karangaroa. He rangatira ia nō te iwi Maruiwi nō te motu o Motuihe, kei te whanga o Hauraki. I tūtaki a Karangaroa ki a Hinerehia i te wā e kohi rēhia ana ia i tātahi.

He tohunga a Hinerehia ki te whakarite, ki te mahi me te whakatae anō hoki i te muka. He tohunga anō hoki ki ngā mahi raranga kākahu, kete, whāriki. Ko te pō anake te wā ka raranga a ia. Kia awatea, kua huna ia i āna mahi kia kore e pāngia e te rā. He tikanga tēnei nō ngā iwi patupaiarehe, i te mea ki te pā mai te rā, ka whakakāhoretia ā rātou mahi raranga, nā, kua ngaro tonu atu ō rātou pūkenga mahi mō ēnei tū mahi.

Tino hiahia ana ngā wāhine o Motuihe ki te akoako i ngā pūkenga raranga o Hinerehia. Me tō rātou mōhio, e kore rātou e whai wāhi atu ki aua pūkenga rā i te pō, kei te pōuri kē hoki. Otirā, ka whakaae nā tētahi o ngā tohunga ki te tinihanga i a Hinerehia; kia pōhēhē ai ia kei te pō tonu te haora. Nā, ka raranga tonu nā a Hinerehia ahakoa kua puta kē mai te rā, ka mahi tonu. Ka mutu, ko ngā wāhine rā ērā e huna rā i te taha - e whātaretare atu ana ki a Hinerehia e raranga harakeke mai rā.

Ka ngenge haere a Hinerehia, kātahi ka whakatakotohia nā e ia ana mahi ki te taha. Me te mōhio tonu, kua tinihangahia a ia e tētahi. Ka waiata nā i tana waiata tangi mō tana hoa rangatira me ā rāua tamariki. I reira tonu, ka heke mai tētahi kapua, ka kawea atu a Hinerehia ki tōna kāinga tūturu.

Nā, nō kōnei rā ngā pūkenga raranga o ngā wāhine o Hauraki me ō rātou mātauranga ki te raranga. Waihoki, koia te te take ka mahia ēnei mahi i te awatea anake, kaua i ngā pō. Ki te mahi raranga te tangata i ngā pō, ākene pea ka raru. Pērā i a Hinerehia rā.