Whakataukī

Whakarongo mai ki ēnei kōrero

"Hūtia te rito o te harakeke,

Kei hea te kōmako e kō?

Kī mai koe ki ahau,

He aha te mea nui o te ao?

Māku e kī atu ki a koe

He tangata, he tangata, he tangata."

Ki te tangohia te rito o te harakeke, kāhore he wāhi hei nohoanga mō te kōmako, ā, kāhore hoki te pā harakeke e tipu tonu. Ko te tohu o te pā harakeke ko te whānau. Ko te rito te tamaiti, te mokopuna o te whānau. Ko ngā awhi rito ko ōna mātua. Ki te tangohia te rito, ki te kore rānei e tiakina ngā tamariki o te whānau, me pēhea te whānau e ora tonu ai ā ngā tau kei te heke? Ko ā tātou tamariki mokopuna ngā rangatira mō āpōpō. Ā tōna wā, ka riro mā ngā rangatahi tonu tātou te iwi Māori e ārahi. Nā reira, ko te tino kaupapa e tohutohu nei tēnei whakataukī; ko te tangata tonu te mea nui. Ko te wahine, ko te tāne, ko te tamaiti, ko te mokopuna. E whakapuakina ana taua whakataukī nei i rō whaikōrero, i rō tuhinga, aha atu, hei whakaatu i te mana me te tapu tonu o te tangata.

Whakarongo ki ēnei kōrero

"Tūngia te ururoa, kia tupu whakaritorito te tupu o te harakeke"

Ko te tino kaupapa o tēnei whakataukī e kī ana; whakawāteatia atu ngā otaota tawhito kia whai wāhi ai ngā mea hou ki te tupu, ka puāwai. I ēnei rā kei te whakamahia taua kōrero nei hei kī: waiho ngā rāpihi ki te taha, arā, haere hāngai atu ki te ngako o te kaupapa.

Whakarongo ki ēnei kōrero

"Kua tupu te pā harakeke"

He whakataukī tēnei hei whakaatu kua tupu te whānau. Ka rongo koe i tēnei whakataukī i ngā tangihanga. Arā, ka matemate ngā kaumātua, heoi anō ka whānaunau tonu mai ngā mokopuna, te pā harakeke rānei.

Whakarongo ki ēnei kōrero

"Me te wai kōrari"

Ko te wai kōrari te miere o te putiputi harakeke. Ko te miere he reka rawa atu, nō reira e kōrero ana tēnei whakataukī mō tētahi mea tino ātaahua, tino reka anō hoki.